初時以為「少年四大名捕」以查案為主，點解重點在江湖事，而且牽涉謀朝，其實老老實實作幾單案查下仲好啦，而家變左眼高手低，無甚睇頭。 亞視的「選美風雲五十年」本來應該好多料，事實亦睇得出在資料搜集方面落過工夫，但仍然好唔夠。有一集講選美，請到電視小姐王綺琴同環球小姐香港區代表選拔賽之鍾淑慧上去講，主持王賢誌講左幾次「騎呢選美」，喂，有幾騎呢呀？名正言順選出黎，騎呢得過「明日偶像」？況且人地俾面上去傾偈，唔應該因為與無線之怨，將怨氣發洩在嘉賓身上，果然無大將之風。 點解兩個免費電視台咁少恐怖題材的節目？有D人真係好無聊，少少恐怖就話嚇親，要投訴。我都要投訴呀，投訴冇恐怖劇睇。 「蘇good」頭幾集教到實用烹飪，但後來連做幾集澳門料，同以前「諸事厘」差唔多，麻麻地。聽講阿蘇被人投訴講話粗俗教壞細路，又話佢撒鹽落海，呢D投訴係幾無聊，但阿蘇有時鬧人理由唔充分，例如滾刀，真係唔識就唔識啦，除非佢一早講明係烹飪課進階，幼稚生咪睇。 朱茵在「志雲飯局」話十四年前響內地拍戲時，有一晚差D捉姦在床，好多人都知佢講某君。其實上天係公平的，邊個唔知佢初時亦係從其他人手中接過某君，大家又未結婚，人地收埋新女友響洗手間已經表示在乎佢感受，俾足面啦。 亞視如果爭氣D，自己製作弱唔緊要，但可以播多D好睇的外購劇，例如唔入「小婦人」、「胭脂雪」呢種劇，收視就唔會讓無線專美。 |